ЯҢАЛЫКЛАР

8 март көнне Чапшар авыл клубына авыл әбиләрен хөрмәтләп, «Тормыш яме - әнкәй, хатын-кыз» дип исемләнгән бәйрәм кичәсенә чакырдылар.

12 мартта 13.30 сәгатьтә «Татарстан 24» телеканалында «Торак-коммуналь киңәшләр» программасы булачак, анда Татарстан Росреестры һәм Кадастр палатасы экспертлары катнашачак.

Туры эфирда Росреестрның Татарстан Республикасы буенча идарәсенең инвестицион проектлар буенча күчемсез милекне дәүләт теркәве бүлеге башлыгы Энҗе Мөхәммәтгалиева һәм Татарстан Кадастр палатасының юридик бүлеге башлыгы Ләйсән Мельникова телевизор караучыларга торак һәм торак булмаган биналарны яңадан планлаштыру, үзгәртеп кору һәм реконструкцияләүнең төп кагыйдәләрен аңлатачаклар.

"Татарстан Республикасы РТПЦ" РТРС филиалы хәбәр иткәнчә, 2020 елның 17-19 мартында 08.00 сәгатьтән 18.00 сәгатькә кадәр Шәмәрдән т.п. радиотелеүзәгендә телеканалларны цифрлы форматта трансляцияләүне гамәлгә ашыручы тапшыручы җиһазларны резервлау системасын монтажлау сәбәпле , 1 һәм 2 федераль мультиплекс (РТРС-1, РТРС-2) цифрлы телерадиотапшыруларның техник чараларын өзеп кую башкарылачак.

Исегезгә төшерәбез, Татарстанда 11 марттан 27 мартка кадәр авыл халкының эшлекле активлыгын арттыру буенча зона семинар-киңәшмәләре узачак. Семинарлар уздыруда Татарстан Республикасы Дәүләт Советы Рәисе Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Дәүләт Советы Рәисе урынбасары Марат Әхмәтов, Татарстан Республикасы Премьер министры урынбасары – Татарстан Республикасы авыл хуҗалыгы һәм азык-төлек министры Марат Җәббаров, Татарстан Республикасы Дәүләт Советының Экология, табигатьтән файдалану, агросәнәгать һәм азык-төлек комитеты рәисе Азат Хамаев, Татарстан Республикасы Дәүләт Советының Экология, табигатьтән файдалану, агросәнәгать һәм азык-төлек комитеты рәисе урынбасары Таһир Һадиев, Татарстан Республикасы Министрлар Кабинетының АПК, җир мөнәсәбәтләре һәм кулланучылар базары идарәсе башлыгы Ленар Фәттерахманов, Татарстан Республикасы муниципаль берәмлекләре Советы рәисе Әгъзам Гобәйдуллин, муниципаль районнар, авыл җирлекләре башлыклары, кооперативлар җитәкчеләре, фермерлар һәм шәхси ярдәмче хуҗалыклар башлыклары катнаша.

9 март көнне Бөрбаш Сәрдегәне авыл клубында Халыкара хатын-кызлар көненә багышланган «Иң кояшлы көн бүген» дигән тематик концерт булып узды. Бөрбаш, Сәрдегән, Алан авылы үзешчәннәре оештырган бу концерт бик матур, җанлы узды. Зал тамашачыларның көчле алкышларына күмелде. 

7 март көнне Куныр мәдәният йортында “Җырым булсын бүләгем” дип исемләнгән Халыкара хатын-кызлар көненә авыл үзешчәннәре тарафыннан бик эчтәлекле, күңелле концерт үткәрелде. Концертта Илфат Гыйләҗетдинов, Гөлчәчәк  Нәҗипова, Илсөяр Закирова, Әдилә Гайнуллина  матур җырлары белән сөендерделәр. Авыл аксакалы Сафиуллин Камал абыйның хатын – кызларыбызны хөрмәтләп язган шигыре барысының да күңеленә хуш килде. Куныр кияве, танылып килүче яшь җырчы Булат Зыятдиновның моңлы җырлары  концертны тагын да җанландырып җибәрде.

8 март - яше нинди булуга карамастан, һәр хатын-кыз өчен үзенчәлекле көн. Аерым котлауларга яраткан әбиләребез лаек. Алар өчен 8 март көнне Иске Көшкәт авыл клубында "Яраткан кешеләребезгә багышлана" дигән тематик кичә үткәрделәр. Кичә шигырьләргә, җырларга бай булды, бәйрәм өстәле дә әзерләнгән иде. Әбиләр рәхәтләнеп күңел ачтылар, клубтан күтәренке кәеф белән киттеләр.

8 март көнне Түбән Кенә авыл клубында авыл егетләре хатын кызларга ял концерты тәкъдим итте. Матур җырлар, дәртле биюләр, күңелле скетчлар тамашачы күңелен яулады.

Яңгул авылына хас матур традиция – ир-егетләр көче белән әзерләнгән, 8 март  - Халыкара хатын-кызлар көненә багышланган "Без бит көчле сез булганда" дип исемләнгән концерт быел аеруча зур уңыш белән узды. Чыгышны алдан әзерләнгән күңелле видеоролик белән башлап җибәрделәр. Шулай күңелле башланып киткән,  җырлар, биюләр, көчле юмор белән үрелеп барган ике сәгать ярымлык концерт бер сулышта каралды. Һәр чыгыш көчле алкышлар белән бәяләнде. Шунысы куандыра: концертта төрле яшьтәге үзешчәннәр катнашты. Кечкенә мәктәп балаларыннан алып, пенсия яшендәгеләргә кадәр бербөтен булып менә дигән чыгыш ясадылар. 

11 март көнне Балтач мәдәният үзәгендә прокуратура, салым инспекциясе, экология һәм эшмәкәрлекне үстерү өлкәсенә ярдәм итү үзәге белгечләре катнашында район башлыгы Рамил Рәшит улы Нотфуллин җитәкчелегендә эшмәкәрләр белән очрашу узды.