ЯҢАЛЫКЛАР
Балтач районының Чепья җирлегендә урнашкан, 1965 нче елда тарих укытучысы Гарифҗан Галиевич тарафыннан оештырылган, 1000 нән артык экспонат тупланган “Халыклар дуслыгы” музее белән без горурланабыз. ”Наз” тернәкләндерү бүлекчәсендә тернәкләнү узучы мөмкинлеге чикле кешеләр hәм өлкәннәр өчен 19 февральдә бу музейга экскурсиягә бару мөмкинлеге туды.
Смәел авылында яшәүче сугыш инвалиды Нәкыйп Нәби улы Нәбиевка 20 февраль көнне 90 яшь тулды.
20 февраль көнне Түнтәр авыл китапханәсендә 8 сыйныфта укучы китап укучылар белән герой-шагыйрь М. Җәлилнең тууына 110 ел тулу уңаеннан "Исеме аның моңлы бер җыр..." исемле "Йолдызлы сәгать" үткәрелде. Китап укучылар үзләренең М. Җәлилнең тормыш юлы һәм иҗаты турында булган белемнәре белән көч сынаштылар, татар халкының бөек улы белән горурландылар, өйдә укыр өчен матур әдәбият сайладылар.
15 февра ль көнне Карадуган авылындагы Муса Җәлил музеенда авыл китапханәсе һәм музей белән берлектә 3-4 сыйныф укучылары өчен
Муса Җәлилнең тууына 110 ел тулуга багышланган “Гомерем минем моңлы бер җыр иде” исеме астында әдәби кичә үткәрелде . Музей хезмәткәре Залялиева Лилия шагыйрьнең балалык еллары , иҗаты белән белән таныш-
тырды. Авыл китапханәчесе Мубаракшина Фирдания шагыйрьнең бала-
лар өчен чыгарган журналлары, язган әдәби әсәрләре турында сөйләп
үтте. Кичә ахырында Муса Җәлилгә багышланган видеофильм күрсәтелде.
Әфганстанда хезмәт итеп кайткан Субаш авылы егетләре ел саен “Ватанны саклаучылар көне” уңаеннан Субаш авыл китапханәсендә очрашып, аралашып, күңел ачарга яраталар. Быел да 19 февраль көнне “Ватан була бер генә” дигән очрашуга кабат җыелдылар. Егетләребезне котларга Субаш авылында туып үскән хәрби хезмәткәр Самара өлкәсендә хезмәт итүче өлкән лейтенант Гайнетдинов Рафил Фагыйль улы килде. Ул барлык ир-егетләрне бәйрәм белән котлады һәм олы рәхмәтен белдерде. Очрашуга килгән 7-9 сыйныф укучылары абыйларына кызыксындырган сорауларын бирделәр, аларның уй-кичерешләрен кызыксынып тыңладылар. Кичәбез җырларлар, күңелле уеннар белән үрелеп барды.
21 февраль – Халыкара туган тел көне уңаеннан Балтач үзәк китапханәсе хезмәткәрләре тарафыннан Балтач урта мәктәбенең югары сыйныф укучыларына “Туган тел –минем өчен...” дип аталган плакат – ачык трибуна тәкъдим ителде. Яшүсмерләр туган тел хакында үз фикерләрен яздылар.
19 нчы февраль көнне "Халыклар дуслыгы" музеенда кабаттан "Наз" тернәкләндреү үзәге кунаклары булып китте. Кунаклар музеебызны ошатып, туганнары-якыннары белән киләчәктә дә килергә дигән теләктә калдылар.
Халкыбызның милли гимнына әйләнгән, сөекле Тукаебыз язган “Туган тел” җыры белән башланып киткән “Кадерле һәм гүзәл Туган телем” дип аталган тематик кичә Балтач үзәк балалар китапханәсендә 19 февраль көнне Туган тел көне уңаеннан узды. Кичәгә килгән Балтач урта мәктәбенең 5А, Б сыйныфы укучылары ( укытучылары Гарифзянова Н.К., Шакирзянова Р.Р) туган телебез турында мәгълүмат алдылар, Туган телебезгә багышланган шигырьләр тыңладылар, төрле уеннарда катнашып белемнәрен сынадылар. Экраннан Туган телебезнең телләр аренасында тоткан урынына багышланган видеоролик карап, ана телебезне белүнең мөхимлегенә төшенеп киттеләр.
Халкымның зур хәзинәсе-
Ул минем Туган телем.
Алтыннан да кыйммәтледер,
Балтач җирлегендә яшәүче Гыйлмуллин Гәбделәхәт Гәбделбәр улына 19 февраль көнне 95 яшь тулды.
“Укучының мәдәни көндәлеге” кысаларында рус балалар язучысы Агния Бартоның тууына 110 еллык уңаеннан 19 февраль көнне Балтач үзәк балалар китапханәсендә Балтач урта мәктәбенең 3А сыйныфы укучылары ярдәмендә әзерләнеп (укытучылары Галимуллина Р.М., Валиева А.И.) “Наша любимая Агния Барто” исемле әдәби кичә узды. Балалар шагыйрәнең иҗаты белән танышканнан соң аның шигырьләрен сөйләделәр, җырын башкардылар. Кичәбезне аудиоязмадан шагыйрәнең үз тавышы белән сөйләгән шигырьләре, “Веселые стихи любимой поэтессы Барто” исемле китап күргәзмәсе һәм аның иҗаты буенча презентация баетты. Кичә ахырында китап укучыларыбыз Барто иҗаты буенча төзелгән уеннарда катнаштылар. 2016 ел кино елы булу уңаеннан, шагыйрәнең әсәрләре буенча төшерелгән кинофильмнар турында да әйтелде. Кичәбез А.Бартоның “Снегирь” шигыре буенча төшерелгән мультфильм карау белән төгәлләнеп, балалар өйләренә укырга яраткан шагыйрәләренең китапларын алып киттеләр.