ЯҢАЛЫКЛАР
Балтач бистәсендә халыктан җыелган үзара салым акчаларына тротуарлар салу, юлларны төзекләндерү эшләре дәвам итә. Күптән түгел генә Кави Нәҗми урамыннан Балтач урта мәктәбенә менә торган юл буйлап тротуар салынды. Халыктан җыелган акчаларның максатчан тотылуы нәтиҗәсендә бүген балаларыбызның мәктәпкә имин юллардан бара алуына күңел сөенә.
Балтач шәһәр җирлеге башкарма комитетының 26 сентябрь көнне район Советының кече утырышлар залында референдум уздыру һәм үзара салым акчасын нинди эшләргә тоту буенча утырыш булды. Аны район башлыгы Рамил Нотфуллин алып барды.
29 сентябрь көнне Балтач үзәк балалар китапханәсе мөмкинлекләре чикләнгән нәни китап укучыларын“Нәни куллар җылысы” исемле очрашуга җыйды. Балалар яңа кайткан китаплар, журналлар белән таныштылар.Алар барлык тырышлыкларын, күңелләрен биреп тозлы камырдан көзге картина эшләделәр.
28 сентябрь көнне районыбызның бертөркем мәгариф ветераннары өчен Татарстан Республикасында үткәрелүче "Мәрхәмәтле Татарстан" акциясе кысаларында "Өлкәннәр көне" , "Мәктәпкәчә белем бирү һәм тәрбиячеләр көне", Мәгариф хезмәткәрләренең һөнәри бәйрәмнәре уңаеннан Бөрбаш авыл җирлегенә экскурсия оештырылды.
“Көзге мәрхәмәтлелек атналыгы” кысаларында “Наз” тернәкләндерү бүлекчәсенә Субаш мәдәният йорты хезмәткәрләре хәйрия концерты белән килделәр. Фәизов Хәлил Равис улы җитәкчелегендә оештырылган бу концерт бик күңелле узды. Лидия Габделхакованың биюләре өлкәнәребезне таң калдырды. Хәлил Фаизовның гармунда татар халык көйләренә тезмәләр уйнавы концертка ямь өстенә ямь бирде. Концерт шаян мәзәкләр, такмаклар белән бергә үрелеп барды. Катнашучылар тернәкләнүчеләр белән бергә яшьлекләрен искә алып яшьлек җырларын җырлап та, биеп тә алдылар.
“Наз” да тернәкләнү узучы инвалидлар, пенсионерлар Субаш мәдәният йорты хезмәткәрләренә уз теләкләрен, рәхмәтләрен җиткерделәр.
Бөтендөнья туризм көнендә Чепьядагы социаль тернәкләндерү бүлекчәсендә тернәкләнү узучы инвалидлар hәм пенсионерлар татар халкының бөек шагыйре Г.Тукай иҗатына багышланган “Тукай – Кырлай” музеенда экскурсиядә булдылар.
25 сентябрьдән “Осенняя неделя добра” атналыгы игълан ителде. Бу уңайдан Яңгул китапханәчеләре китап укучылар таныш булсын өчен “”Жизнь дана на добрые дела” һәм “Доброе сердце лучшее богатство” исеме астында тумыштан сәламәтлеге чикләнгән укучы-Камалетдинова Эльвина янында булып ,аның хәлен белеп,укуында зур уңышларга ирешүен теләп кайттылар.
26 сентябрь көнне Куныр филиал № 12 китапханәсе һәм Куныр мәдәният йорты Куныр урта мәктәбенең 4 сыйныф укучылары өчен "Без бергә" дип исемләнгән әңгәмә уздырды. Әңгәмә барышында укчыларга "Мәрхәмәтле Татарстан акциясе турында мәгълумат бирелде. Татар халык әкиятләренә нигезләнеп, укучыларга бердәм булырга, бер-береңә, дусларыңа, туганнарыңа ярдәм итеп яшәү серләре буенча кызыклы әңгәмә узды.