ЯҢАЛЫКЛАР
Әби-бабайлы кеше-бик бәхетле кеше!,дип белми әйтмәгәннәрдер борынгылар!... Чыннан да, өлкән буыннарыбыз булганда йорт та җылы, күркәм, алар белән тормышлар да көйле. Әби-бабайдан, гомумән, өлкәннәрдән тормышка көч, үрнәк һәм горурлык бөркелеп тора. Моның шулай икәнен 2 октябрь көнне Өлкәннәр көненә багышланган “Йортыбызның яме сездә!” дип исемләнгән музыкаль-тематик кичәбездә ачык күренде. Көек авылы хөрмәтлеләре бусагадан атлап кергәндә үк күңелле халәт хасил булды, чөнки аларны кадерле җимешләре оныклары каршы алды. Нәниләр белән куйган муз.номерлар, А.Алишның “Утлы йомарка” әсәрен сәхнәләштерү һәм азактан әбиләребез б.н биеп алу да бик куанычлы булды. Иң сөендергәне авылыбзының иң өлкән кешесе Рауза апа Гараеваның катнашуы да иде. Чарабызны кадерлеләребезгә дип әзерләнгән өстәл тулы нигъмәт белән авыз иттереп тәмамладык.
Мирхәйдәр Фәйзинең тууына 125 ел тулу уңаеннан Түнтәр авыл китапханәсе “Галиябанулар бармы дөньяда?” исемле плакат-ачык трибуна бәйгесенә яшүсмерләр арасында сорашу уткәрде һәм җаваплар, фикерләр плакатка язылды. Китапханәбез авылыбыздагы урта мәктәп белән даими хезмәттәшлек итә. Сорашуны да иң элек югары сыйныфта укучы китап укучыларыбыз белән башладык. Алар бик теләп катнаштылар. Сорашуда 18-25 яшьлек китап укучыларыбыз да читтә калмады. Китапханәбез аларга рәхмәтен белдерә.
3 октябрь көнне ,өлкәннәр көне уңаеннан, Пыжмара төп белем бирү мәктәбендә корбан ашы үткәрелде.Әлеге бәйрәмне үткәрүдә "Кама" күмәк хуҗалыгы,Пыжмара җирле үзидарәсе,Пыжмара төп белем бирү мәктәбе, авыл китапханәчесе, мәдәният йорты хезмәткәре катнашты.
Өлкәннәр көне – ул бәйрәм генә түгел, ә олы тормыш юлын узучыларга карата иң яхшы сүзләр һәм ниятләр җиткерелүче үзенчәлекле тормыш мизгеле дә.
Халыкара Өлкәннәр көне кысаларында Балтач “Наз” үзәгенең өйгә барып социаль хезмәт күрсәту булекчәсендә төрле чаралар уздырыла. Чепья җирлегендә яшәүче социаль карамакта торучы өлкәннәргә социаль хезмәткәрләр өстәл артында очрашулар оештырдылар.Чәй табыныннан өлкәннәребез күңел күтәренкелеге белән таралыштылар.
30 сентябрь көнне Халыкара Өлкәннәр көне уңаеннан Балтач районының мәдәният үзәгендә бик матур чара булып узды. Бу бәйрәмгә районыбызның 50 һәм 55 ел бергә парлы гомер иткән күркәм гаиләләре дә чакырулы иде. "Алтын юбилярлар" - Габдулфаяз Габдулла улы һәм Кадрия Якуп кызы Габдуллинар, "Зөбәрҗәт юбилярлар" - Камил Бари улы һәм Рәйсә Хөсәен кызы Бариевлар сәхнә түренә чакырылдылар. Юбилярларны Балтач муниципаль районы башлыгы Рамил Нотфуллин җылы котлады, рәхмәт сүзләрен җиткерде. Район ГХАТ бүлеге хезмәткәрләре тарафыннан истәлекле бүләкләр һәм чәчәк бәйләмнәре тапшырылды.
Административ хокук бозган гражданнарга беренче очракта ук кисәтү урынына протокол төзелеп, штраф салына. Ләкин халыкка бу гына көчле тәэсир ясап бетерә алмый ахрысы? Район башкарма комитеты каршында эшләп килүче чисталык комиссиясе (АДМ) утырышларына җаваплылыкка тартылган гражданнарның күпчелеге хокук бозуларны аек акыл белән, белә торып башкарганнар дип нәтиҗә ясап була. Шулай булмаганда, авыл җыеннарында кисәтүләр ясалуга, аңлату эшләре алып барылуга карамастан, авыл җирлекләрендә чүплекләр бетерелеп, хуҗалыктан чыккан көнкүреш калдыкларын һәр йортның капка төбеннән техника белән җыюны оештырдылар. Ә Нөнәгәр авыл җирлегендә табигатьне пычратып, чүп китереп аударганнар. Билгеле, һәр чүпнең үз адресы була.
4 октябрьдә Татарстанда “Зур этнографик диктант” Бөтенроссия акциясе үтәчәк.
Кешеләрнең милләтләр турында белем дәрәҗәсен ачыклау, милләтара мөнәсәбәтләргә игътибарны арттыруны максат итеп алган әлеге проект пилот режимда үтәчәк. Берьюлы 20 районда диктант язу оештырылачак. Ул тест рәвешендә узып, биредә теләгән һәр кеше катнаша ала. Әлеге чара безнең районда 4 октябрь көнне район үзәк китапханәсендә үтәчәк.
Татарстанда узган бүгенге авыл хуҗалыгы хезмәтчәннәре хөрмәтенә багышланган бәйрәмдә үсемлекчелек һәм терлекчелектә югары нәтиҗәләргә ирешкән районнарның иң алдынгы 20ләп хуҗалыгын билгеләп үттеләр. Шул исемлектә районның "Яңа тормыш" җәмгыяте дә бар. Эш күрсәткечләре буенча уртача уңыш гектарыннан 31,9 ц, 5410 т ашлык суктырылган, 8 ай эчендә савым сыерлар нәтиҗәлелеге – 5007 кг булган өчен зур мактауга лаек булды.
“Хезмәт сөйгән халык - дан-хөрмәткә лаек!” дип юкка гына әйтмиләрдер. Чөнки, бүген – 29 сентябрь көнне Татарстанда авыл хуҗалыгы хезмәткәрләрен хөрмәтләделәр. Татарстанның авыл хуҗалыгы һәм эшкәртү сәнәгате тармагының иң яхшы хезмәткәрләрен Рөстәм Миңнеханов тәбрикләде.
Казанның "Корстон" комплексында, Авыл хуҗалыгы һәм эшкәртү сәнәгате хезмәткәрләренең һөнәри бәйрәме якынлашу уңаеннан, Татарстан Президенты Рөстәм Миңнеханов исеменнән кабул итү тантанасы узды. Бәйрәм чарасында шулай ук Татарстан Республикасы Дәүләт Киңәшчесе Минтимер Шәймиев, Татарстан Премьер-министры урынбасары - авыл хуҗалыгы һәм азык-төлек министры Марат Әхмәтов, республика районнарында Авыл хуҗалыгы идарәләре башлыклары, авыл хуҗалыгы предприятиеләре җитәкчеләре, тармак алдынгылары катнашты.