ЯҢАЛЫКЛАР

Смәел авыл китапханәсе, урта мәктәпнең озынайтылган көнгруппасы ярдәме белән, өлкәннәр декадасы уңаеннан"Гомер көзем-тормыш көзгем"исемле кичә уздырды.Кичә балаларның чыгышлары,өлкәннәребез өчен  конкурслар белән үрелеп барды.

5 октябрь көнне Куныр мәдәният йортында өлкәннәр ункөнлеге уңаеннан, клуб, китапханә, мәктәп, ООО "Якты юл" җәмгыяте һәм авыл советы тырышлыгы белән әзерләнгән "Гомерләрнең алтын көзе" дип исемләнгән кичә булып узды. Кичәгә Куныр, Шода авылы олылары чакырулы иде. Кичә чәй табыны белән башланып китеп, концерт белән дәвам итте.

Өлкәннәр көне уңаеннан,  4нче октябрь көнне мәдәният, китапханә мәктәп коллективы белән берлектә  Субаш төп гомуми белем мәктәбендә                   “ Гомерләрнең алтын көзләре”дип исемләнгән әдәби музыкаль  кичә үткәрелде.

Татарстан Республикасы Президенты авыл хуҗалыгының тырыш хезмәткәрләренә Татарстан Республикасы дәүләт бүләкләрен тапшырды. Алар арасында безнең районнан "Татарстан"  хуҗалыгы тракторчысы Зөлфәт Хәкимов  та бар иде.  Президент аңа озак еллар намуслы   хезмәте өчен  "Атказанган механизатор" исеме бирде.

5 октябрь көнне Борнак авыл китапханәсендә өлкәннәр һәм укучылар катнашында “Өлкәннәргә кадер һәм хөрмәт”исемле очрашу кичәсе үткәрелде.Өлкәннәр үзләренең хәтирәләрен искә төшерделәр.Укучылар өлкәннәргә бик матур итеп шигырьләрен сөйләделәр.Очрашу бик җанлы үтте.

Районыбыз мөгаллимнәре 4 октябрь көнне район  мәдәният үзәгендә үзләренең традицион һөнәри  бәйрәмнәрен билгеләп үттеләр. Аларны бу тантаналы  чарада район башлыгы Рамил Нотфуллин,  район башкарма комитеты  җитәкчесе Рамил Шакиров, аның урынбасары Илһам Гайнетдинов, мәгариф ветераны Гарифҗан Мөхәммәтшин, район мәгариф идарәсе җитәкчесе Алия Зәкиева тәбрикләде. 

Балтач бистәсе урамнары көн саен тротуарларга байый. Халыктан җыелган үзара салым акчалары нәтиҗәсендә уңайлыклар булдырыла, алардан барлык райондашларыбыз да бердәм  файдалана. 2018 ел өчен  планлаштырылган эшләрне башкарып чыгу  өчен дә һәр җирлектәге   халыкның активлыгы кирәк. Шулай булганда гына тирә-ягыбыз матур, юлларыбыз төзек булыр.

Куныр авылында гомер итүче Сәгыйдә Гариф кызы Низаметдинованың да 90 яшьлек юбилее “Өлкәннәр декадасы” чорына туры килде. Көзнең үз яме, үз муллыгы булган кебек, кеше гомеренең көзе дә нәкъ шушы ел фасылына тиң. Нәтиҗә ясар чак! 4 октябрь көнне район башлыгы урынбасары Наил Сабирҗанов, район социаль яклау бүлеге җитәкчесе Алсу Гатиятуллина, Куныр авыл җирлеге башлыгы Зиннур Асхадуллин , “Якты юл” җәмгыяте рәисе Раиф Хәкимов юбилярны котлап, изге теләкләрен җиткерделәр. Президент В.В. Путинның Котлау открыткасын, район башлыгы, авыл җирлеге һәм соңгы эш урыныннан бүләк-күчтәнәчләр тапшырдылар. 

Карадуган авылында яшәүче Наилә апа Җиһангирова өчен 3 октябрь көне хатирәләргә бай булгандыр, мөгаен?! Чөнки бу көнне район мәдәният үзәгендә “Халыкара өлкәннәр көне” уңаеннан районыбызның мактаулы исемнәргә ия мәртәбәле өлкәннәре хөрмәтенә бәйрәм концерты оештырылган иде. Шушы кичәдә алып баручылар алгы урыннарның берсендә утырган акъәбигә карап, арабызда 90 яшьлек юбилеен каршылаучы ветераныбыз да бар әле, дип Наилә апаның исемен атагач, зал бер мәлгә тын калды. Аннан соң гаҗәпләнү катыш соклану хисләрен белдереп көчле алкышларга күмде юбилярны. Аны районыбыз башлыгы Рамил Нотфуллин махсус залга төшеп, ихлас теләкләрен әйтеп тәбрикләде. Россия Президенты В.В. Путинның Котлау Хатын һәм истәлек бүләкләре тапшырды. 

   Куныр авылында яшәүче Сәгыйдә Гариф кызы Низаметдиновага 4октябрь көнне 90 яшь тулды.