ЯҢАЛЫКЛАР
7 февраль көнне «Наз» халыкка комплекслы социаль хезмәт күрсәтү үзәгендә социаль һәм медицина хезмәткәрләре өчен уку оештырылды. Директор Гөлнара Әхмәдиева 2016 елда «Наз» үзәге эшчәнлегенә анализ үткәрде, 2017 елдагы төп бурычларын әйтеп китте.
Бәләкәй сабыймы без, олы кешеме- барыбызның да әкияти тормышка, андагы торышка ышанасы килә! Хыял, өмет, әлбәттә, бары якты киләчәккә әйди! Аеруча да андагы образларга безнең нәни дусларыбыз чын күңелдән ышана! Көек авылы китапханәсендә даими рәвештә төрле категория яшьтәге китап сөючеләр белән эшләр алып барыла. Гыйнвар башында балаларыбызга багышлап “Әтәч дуста кунакта” дип исемләнгән Яңа ел кичәсе үткәрсәк, 20 гыйнвар көнне башлангыч сыйныф укучылары белән балалар почмагын бизәп торучы матур, төсле рәсемнәр белән бизәлгән әкият китапларына күзәтү ясадык. Бүгенге замана мультфильмы герое “Фиксик” килү дә, шулай ук төрле татар әкиятләреннән алынган персонажларга хас җихазларны әйтә алулары да киләсе буыныбызның татар китапларын яратып укуын дәлилли!Бүгенге замананы интернет чолгап алса да, нәни дусларыбыз аннан күпкә ерак торалар һәм алар китапханәгә кергән саен махсус балалар почмагы итеп ясаган бүлеккә юнәләләр! Нәни дусларыбыз белән бик теләп әкиятләрне бәйрәмнәрдә сәхнәләштерәбез дә!
“Интернет: Яхшымы, начармы” яки “Балалар өчен куркынычсыз интернет”! 5 февраль көнне Көек китапханәсендә 31 гыйнвардан 7 Февраль гә кадәр Халыкара “Балалар өчен куркынычсыз интернет” атналыгы уңаеннан үткәрелгән түгәрәк өстәл эш алымында шушындый һәм башка сораулар күтәрелде. Биредә башлангыч сыйныф укучылары б.н. бергә 8 сыйныфка хәтле укучылар да катнашты. “Бүгенге тормышны интернеттан башка күз алдына да китереп булмый, ләкин ул безне бары төпкә тарта, ә бу безнең киләчәк куркыныч астында дигән сүз бит” дигән фикерләр дә яңгырады балалар тарафыннан. Укучылар үзләренең көнкүреш вакытларында интернетның ни дәрәҗәдә зур урын алып торуларын да искәртеп китте: “Аннан аерылу мөмкин түгел, җитмәсә, укытучылар да күп җавапларны интернет аша алырга куша бит, без нишләргә тиеш инде?!”, диделәр алар. Викторина рәвешендә алып барылган сорауларга-җавап табу, презентация карау да сәгать дәвамында алып барылган бу сөйләшүдә балалар бик күп фикерләр ирештерде. Бүгенге көндә интернет - без, олылар өчен мәгълүмат чарасы гына булса, укучылар өчен “гипноз корыламсы” ул. Бала белмичә, төрле сайтларга, уеннарга керә, шуның белән айлык кәрәзле телефон балансын да бетерә, җитмәсә вирус” дигән афәт сакланган мәгълүматларны да очыра.
Шунысын ассызыкларга кирәк, бүгенге замана балалары бездән күбрәк белә, алар виртуаль тормыш белән бәйле барлык терминнарны да бик яхшы беләләр. Әлеге аралашудан соң, мин дә киләсе буыныбыз өчен горурлану хисе дә кузгалды күңелдә, алар аңлы рәвештә интернетның баш мие, алай гына да түгел, физик яктан да үзләре өчен нинди зыянлы булуын ачык рәвештә әйтә алалар. Күпмедер дәрәҗәдә “гаджит” лардан баш тарта алулары да мине бик сөендерде! Алдагысы яхшы булсын иде инде!
Түнтәр авыл китапханәсендә 31 январь - 7 февраль көннәрендә “Куркынычсыз интернет – балаларга!” (“Безопасный интернет – детям!”) - дип исемләнгән атналык уңаеннан “Куркынычсыз интернет – балаларга!” дип исемләнгән китап күргәзмәсе эшләде. Күргәзмә белән кызыксынучыларга буклетлар өләштек. Һәм 6 февраль көнне 7 сыйныфта укучы китап укучыларыбыз белән “Интернет дусмы, дошманмы?” дип исемләнгән тематик кичә дә үткәрдек. Ике командага бүленеп “Интернет куркынычмы, түгелме?” дигән сорауга җаваплар эзләдек, интернетның уңай һәм тискәре яклары турында сөйләштек. Һәм интернетта үз-үзеңне тоту кагыйдәләре төзедек. Компьютер артына утырып эшләп тә карадык.
Иртәгә - 7 февраль көнне сәгать 15.00тә район мәдәният үзәгендә район башлыгы Рамил Нотфуллин җитәкчелегендә Балтач шәһәр җирлеге халкы өчен ХАЛЫК ҖЫЕНЫ була.
Көн тәртибе буенча узып киткән 2016 елга нәтиҗә, агымдагы елга максат-бурычлар һәм көнүзәк мәсьәләләр турында район башлыгы Рамил Нотфуллин, Балтач шәһәр җирлеге башкарма комитеты җитәкчесе Илдар Габдрахманов, район эчке эшләр бүлеге җитәкчесе Илдар Усманов, район үзәк хастаханәсенең баш табибы Газинур Дәүлиев чыгыш ясаячак.
2 февраль көнне Борнак авыл китапханәсендә 6,7 сыйныф укучылары Республика балалар китапханәсе тарафыннан үткәрелгән "Бу мавыктыргыч дөнья", (“Этот удивительный мир”) дип исемләнгән анкета сорауларына җаваплар яздылар. Бу чарада укучылар туган ягыбызның табигате турында мәгълүмат алдылар, табигатькә багышлап язылган китаплар белән дә таныштылар.
3 февраль көнне Түнтәр авыл китапханәсендә “Комсомолда үткән яшьлегем” дип исемләнгән әңгәмә үткәрелде. Татарстан яшьләренең “Бәхет – хезмәттә” темасына 1958 елны үткәрелгән икенче фестивалендә ВЛКСМ өлкә комитеты һәм Татарстан Культура министрлыгы, комсомол оешмаларының культура өчен походының икенче этабына йомгак ясап, беренче урынны Балтач районына бирүләре һәм күчмә Кызыл байрак тапшырулары турында искә алдык. Аксакалыбыз Рәфхәт абый Зарипов комсомолның 16 съезды делегаты авылдашыбыз Роза апа Ильясовадан интервю да алды. Гомумән, әңгәмәбез бик җылы, мавыктыргыч булды.
3 февраль көнне мәдәният хезмәткәрләренең отчет җыелышы булып узды. Узып киткән 2016 елга эшчәнлек хакында район мәдәният бүлеге җитәкчесе Илдар Насыйбуллин, финанс һәм бюджет мәсьәләләре, керем-чыгымнарны контрольдә тоту хакындагы яңалыклар белән район казначылык идарәсе җитәкчсе Илнар Сафин таныштырды. Мәдәният хезмәткәрләре тарафыннан яңгыраган күп кенә сорауларга җавап бирде, финанс белән бәйле катлаулы проблемаларны эш барышына алып өйрәнергә ышандырды. Мәдәният йорты, клуб хезмәткәрләрен хезмәт хакларының аз булуы, тулы ставкада эшләү мөмкинлеге бирелмәү, җиһазларның тузып баруы, эшләп тапкан яки билет сатудан кергән акчаларның үз файдасына булмавы борчый. Бер-бер артлы шушы темаларга моң-зарларын белдерделәр.
Район хужалыкларында уза торган хисап җыелышыныӊ чираттыгысы «Яӊа тормыш» җәмгыятендә булды.
Хуҗалык рәисе һәм чыгыш ясаган белегечләр 2016 ел нәтиҗәләрен тирән чагылдырган чыгышларны экраннарда төрле слайдлар аша җиткерделәр. Бу хужалыкныӊ уӊышлары республика күләмендә яӊгыраса да, җыелышныӊ юнәлеше мактану түгел, ә кимчелекләрне ачып, аларны киләчәктә булдырмау һәм уӊышларны тагы да саллырак итү юнәлешендә булды. Бу турыда тулырак газетабыз битләрендә биреләчәк.
Ел саен Татарстанның Балтач районында мөселманча иң матур исемнәр кушкан имамнарны бүләклиләр, алар кушкан исемнәрне баш казый үзе тикшерә.
(Казан, 2 февраль, "Татар-информ", Лилия Гаделшина). Татарстанның Балтач районында мөселманча иң матур исемнәр кушкан имамнарны бүләкләделәр. Бу традициягә нигез салынганга инде унбер ел тула: бүген районда яңа буын Зөһрә, Зөләйха, Халидә, Мөхәммәд, Җәлилләр үсеп килә. Ләкин һаман да имамнар Ралина һәм Раяз исемнәреннән котыла алмый интегә икән.