ЯҢАЛЫКЛАР
Бүген, ягъни 10 мартта Балтач эшмәкәрләре белән танышырга Бөтендөнья татар конгрессы Башкарма комитетыннан 8 автобус белән 320дән артык вәкил килү көтелә.
Татарстан Республикасында 9-11 март көннәрендә VI Бөтенроссия татар авыллары эшмәкәрләре җыены үтәчәк. Шул уңайдан авыл җирлекләрендә тормыш алып баручы авыл эшмәкәрләренең эшчәнлекләре белән танышу максатыннан, районыбызга да Бөтендөнья татар конгрессы вәкилләре киләчәк.
Шушы көннәрдә бистәбезнең 3нче номерлы балалар бакчасында капиталь ремонт эшләре башланып китте.
“Мәктәпкәчә белем бирү учреждениеләрендә капиталь ремонт” программасы нигезендә башкарылучы эшләрне “Стройремтех” базасында урнашкан, Нияз Җәббаров җитәкчелегендәге “Строймастер” оешмасы төзүчеләре эшли. Биредә түбә, бинаның тышкы өлеше, тәрәзәләр, ишекләр, керү юлы (входная группа), отмоска, санузел, идәннәр җылытылып эшләнәчәк. Шулай ук тулысынча инженер челтәрләре ремонты башкарылачак.
- План буенча максимум срок 1 август, ләкин аңа кадәр төзелеш эшләре төгәлләнер дип уйлыйм, - ди район төзелеш бүлеге җитәкчесе Илфат Сәгъдиев. Аңарчы балалар башка бакчаларга йөреп тору мөмкинлеген алды. Башка мохиткә күпмедер авырлыклар белән ияләшкән малайлар һәм кызлар бакчаларының ничек яңартылганын күргәч, аны тагын да яратып йөри башлар дип ышанып калам.
Районыбызның кайсы авылында гына күңел ачып, спорт уеннары белән бергә ял итәргә яратмыйлармы икән?
Кайдадыр чана шуалар, кайдадыр җыелып чәй эчәләр, ә менә Смәел авыл җирлегендә гөрләтеп кыш озату бәйрәме узган. - Әлеге чарада төрле кызыклы уеннар, спорт ярышлары оештырылды.Пешкән ризыклар һәм чәй белән балалар бакчасы коллективы,шашлык белән Рөстәм Зарипов гаиләсе авыл халкын сыйлады. Бәйрәм оештыруга үз өлешләрен кертүчеләргә, оештыручыларга барлык авылдашлар исеменнән рәхмәт белдерәбез. Киләсе бәйрәмнәрдә дә шулай актив катнашсак иде, - дип хәбәр итәләр смәеллеләр.
Бөрбаш китапханә филиалында 9 нчы март көнне "Гүзәлләрнең гүзәл көне" исемле кичә үтте.
Озакламый, Балтач кино оешмасы районыбыз тамашачысына татар әдәбияты классигы, күренекле әдип Гадел Кутуйның “Тапшырылмаган хатлар” әсәре буенча төшерелгән кино тәкъдим итәчәк.
Фильмны төшерү урыны итеп, Биектау районының Зур Кавал авылы, Кама Тамагы, Арча районының Наласа авылы һәм Казан сайланган.
Төп рольләрне Галиәсгар Камал исемендәге Татар Дәүләт театры артистлары башкарачак.
13 МАРТ көнне әлеге нәфис фильм тәүге тапкыр район мәдәният үзәгендә күрсәтелә. Башлана: 19.00 сәгатьтә, билет бәясе: 100 сум.
Шулай ук “Тапшырылмаган хатлар” фильмын түбәндәге тәртиптә авыл мәдәният йортларында да карарга мөмкин булачак.
Смәел урта мәктәбендә Ф.Я.Вассерманның “БиС” технологиясе буенча семинар узды. Районыбызда Смәел мәктәбе укытучылары беренчеләрдән булып әлеге технология нигезендә рус теле, география, татар әдәбияты, әдәби уку, җәмгыять белеме, математика дәресләре уздыра.
Семинарда район мәгариф идарәсе җитәкчесе Зәкиева А.Ю., Хәйруллина Р.Р. да катнашты. Алар түгәрәк өстәл артында укытучыларга үз киңәшләрен бирделәр.
“Биоинформатика һәм Синергетика” технологиясе - мәктәпләрдә укыту сыйфатын күтәрү өчен уйлап табылган технология. Ул балаларның фикерләү сәләтен, эшләү тизлеген арттыруга, сөйләм телен үстерүгә юнәлтелгән.
Татарстан Республикасы юстиция министрлыгы Россия юристлары Ассоциациясенең Татарстан региональ бүлеге белән берлектә авыл җирлекләрендә яшәүче гражданнарга бушлай юридик ярдәм күрсәтә.
Татарстан Республикасы Президенты һәм ТР Дәүләт Советы Аппаратларның, барлык төр министрлыкларның җаваплы белгечләреннән торган мобиль мәгълүмати-консультатив бригада безнең Балтач районында 23 мартта 10.00-12.00 сәгатьләрдә Куныр авылы мәдәният йортында, 13.00-15.00 сәгатьләрдә Нөнәгәр авылы мәдәният йортында халыкны кабул итәчәк.
9 нче март көнне 2017 - Татарстанда экология елы уңаеннан Шубан авыл китапханәсендә 1-4 сыйныфлар белән “Могҗизалар кыры” уйнатылды. Максаты: Укучыларда табигатькә, тирә-юньгә, шәфкатьле һәм кайгыртучан булу, бер-берләренә карата хөрмәт хисләре тәрбияләү. Укучылар уеннарда бик теләп катнаштылар һәм бүләкләр алдылар.
7 нче март көнне Шубан авыл китапханәсендә 8 нче март – Халыкара хатын-кызлар көне уңаеннан “Ягез әле әбиләр” кичәсе булып узды. Кичә барышында әбиләр “Истәлегем –солдат альбомым” күргәзмәсе белән таныштылар. , ”Ягез әле әбиләр” бәйгесендә төрле яшьтәге әбиләребез ике командага бүленеп күңелле генә бәйгеләрдә – мәкальләр, табышмак –сораулар; шигырь-хикәя чыгарулар, биюләрдә, кино исемнәрен белүдә һәм башка төрле бәйгеләрдә үзләрен тикшерделәр. Нәтиҗәдә, кичәгә килгән әниләр барысы да бик актив катнашты. Җиңүче дип “Дәү әниләр” командасы танылды. Кичәнең икенче өлеше чәй өстәле артында дәвам итте.
9 март көнне Борнак авыл китапханәсендә “Әнием-күңелем кояшы” исемле кичә иң күп китап укучы әниләргә карата үткәрелде.Әниләргә карата кадер-хөрмәт,ярату,олылау хисләре тәрбияләү максатыннан оештырылган бәйрәм кичәсендә әниләр өчен матур шигырьләр,җырлар җырланды.Кичәбез бик күңелле узды.