ЯҢАЛЫКЛАР

Быел "Үлемсез полк"ка 2 меңгә якын балтачлы кушылды. 

Хәтер маршына гаиләләре белән басучыларны да күрергә мөмкин иде,  җитәкчеләр дә әлеге акциядән читтә калмады, алар да бик матур үрнәк күрсәтте. Өлкәннәребез дә "Үлемсез полк"чылар рәтен тулыландырып, яу кырында башын салганнарны хөрмәтләп, адым саен алар рухына дога ирештерде.

 

Зәлия Фәйзрахманова

Быел бу мәртәбәле очрашуга Балтачыбыздан 8 кеше - сугыш һәм тыл, Әфган җирендә барган канкойгыч сугышларда катнашкан ветераннар барды:
Мансур Хәсбиуллин, Гыйльван Гыйльмуллин, Гафифәбану Мифтахова, Клара Рамазанова, Мәгъсүм Мөхәммәтҗанов, Әминә Габдрахманова, Мөнҗия Гарипова һәм әфганчы Фәрит Галимов барды. Республика Президенты җитәкчелегендәге бу чара Муса Җәлил исемендәге Татар Дәүләт опера һәм балет театрында узды. "Корстон" үзәгендә бәйрәм табыны әзерләнгән иде. 

Шулай ук район башлыгы Рамил Нотфуллин, район хәрби комиссариат җитәкчесе Васыйл Вәлиев, район социаль яклау бүлеге җитәкчесе Алсу Гатиятуллина да катнашты.

10 май көнне Пыжмара авыл китапханәчесе  Ахметшина Дания  Пыжмара  төп белем  мәктәбендә  мәдәни көндәлек  проектын  йомгаклау  чарасы  уздырды. Ел дәвамында  иң күп мәдәни чараларда булып һәм иң күп  китап укып, көндәлегенә  тамга  куйдырган  укучыларны  бүләкләр  көтә!

 10 май көнне Балтач үзәк балалар китапханәсендә мәдәни көндәлек проектын йомгаклау чарасы булып узды. Бу чарага Балтач гимназиясенең 3 А, 3 Б һәм сыйныфы укучылары килде. Алар ике командага бүленеп  Брейн-ринг уенында катнаштылар. Уенның сораулары өч өлештән торды. Алар Бөек ватан сугышына, безнең якта үсә торган куак-    агачларга һәм балалар яратып укый торган әсәрләргә  багышланган иде. Ике команда да зур тырышлык куеп, сорауларга дөрес җавап бирделәр. Залда утыручы  җанатарлар да  уенда актив катнаштылар, үзләренең командаларын яклап , аларга булыштылар.

 

9 май бәйрәме уңаеннан 8 май көнне Чутай авылы һәйкәл янында Бөек Җиңүнең 72 еллыгы уңаеннан " Җиңү алып килде язлар " дип исемләнгән тантаналы митинг булды. Район, авыл җирлеге җитәкчеләренең котлаулары, 1 минут тынлык, сугыш еллары күренешләре, ветеран истәлекләре , үлемсез полк маршын Чутай башлангыч мәктәбе укучылары концерт номерлары белән чиратлаштырып алып барды. Митинг үткәрүгә күп көч куйган мәктәп коллективына зур рәхмәт.

8 май көнне Түбән Кенә һәм Кенәбаш үзешчәннәре көче белән ветераннарыбыз өчен "Сезнен тормыш үзе батырлык" исемле әдәби- музыкаль кичә күрсәтелде.Өлкәннәребез чәй табыны артында сыйланганда, аларга бик матур кичә тәкъдим иттек. Авыл советы җитәкчесе кабат бәйрәм белән котлап, истәлек күчтәнәчләре өләште.

Монополиягә каршы көрәш хезмәтенең Татарстан Республикасы буенча идарәсе җитәкчесе урынбасары райондашлар белән аралашырга килә. 

Монополиягә каршы көрәш Федераль хезмәтенең Татарстан Республикасы буенча идарәсе заманча монополиягә каршы мәсьәләләр һәм төп бурычларны халыкка аңлату буенча зур эш алып бара. 

Әлеге максаттан, иртәгә - 11 май көнне 9. 00 сәгатьтә Монополиягә каршы көрәш Федераль хезмәтенең Татарстан Республикасы буенча идарәсе җитәкчесе урынбасары Рузалин Хәбибуллин гражданнар кабул итә. Район Советының утырышлар залында гражданнар, бизнес һәм җирле үзидарә вәкилләре белән очрашу уздыра.

7 май көнне Таузар авылы клубында тальянчы Усманов Фәргать истәлегенә "Уйнагыз гармуннар!" дигән районара бәйге булып узды. Бәйгедә бик куп гармунчылар чыгыш ясады.

6 май көнне, Түбән Кенә( Нижняя Кня) авыл клубында, «Үзеңне наркотикларга бәйләмә” дигән исемдә,Сәламәт яшәү рәвешен пропагандалау максатыннан Р.Сәгъдинең «Алсу томан » спектакле авыл халкына тәкъдим ителде. Р.Сәгъдинең «Алсу томан » моңсу драмасында гаять мөһим, кирәкле тема – афәт булып бүгенге безгә үтеп кергән наркомания мәсьәләсе һәм ятим, сукбай балалар, яшүсмерләр тормышы сурәтләнә. Чечен сугышы кайтавазы, Чернобыль фаҗигасе, эчкече әти-әнисеннән качып киткән яисә ятим калып, интернатта чит-ят кулында үскән балалар язмышы өчен борчыла драматург. Чарасызлык, һәртөр кимсетелү аларны җимерек йорт подвалына җыйган. Әлеге «тормыш төбендә» яшәүчеләрне ничек итеп наркомания, эчкечелек, фахишәлек сазлыгыннан саклап калырга, тартып алырга? Һәр гасырның – үз проблемасы... Наркомания һәм ташландык балалар – безнең заман чире. “Алсу томан ” спектакле – урамда әти-әнисез калган ятим балалар язмышы турында. Мондагы вакыйгалар бүгенге көн чынбарлыгын чагылдыра. Әлеге спектакль балаларны да, әти-әниләрне дә, бөтен халыкны уйланырга мәҗбүр итә.

4 май көнне Пыжмара авыл китапханәсендә "Читаем детям о войне" дип исемләнгән акция кысаларында "Җиңү- безнең йөрәкләрдә" исемле китап күргәзмәсе төзелде һәм 2,4,5 сыйныф укучылары катнашында М.Җәлилнең "Кызыл ромашка", Р.Валееваның "Сугыш" шигырьләре кычкырып укылды. Акциягә барлыгы 12 укучы катнашты.