ЯҢАЛЫКЛАР

4 июнь көнне Куныр мәдәният йорты хезмәткәре китапханә хезмәткәре белән берлектә “ Наркомания без сина каршы” дип исемләнгән әңгәмә уздырды. Яшьләргә наркомания буенча лекция укылды, сораулар аша аларның наркоманиягә карата уй-фикерләрен тыңланды.

"Гомерләр үтә икән ул

Үтә дә китә икән ул"... Әйе гомер дигәннәре бик тиз үтә. Шушы көннәрдә Чепья авылында яшәүче, гомерен  китапханәче һөнәренә багышлаган Гайфуллина Гөлнара Лотфулла кызы үзенең 70 яшьлек  матур юбилеен билгеләп үтте. Элек бергә эшләгән хезмәттәшләре аны шушы бәйрәме белән котладылар. Ялгызы гына ул үстергән Гөлнара апаның  бүгенге көндә  йорты оныклар белән шаулап тора. Киләчәк гомерендә аңа сәламәтлек, күңел тынычлыгы телибез!

4 июньдә балаларны яклау көне уңаеннан Чутай мәдәният йортында " Күңелле эстафета " дип исемләнгән бәйрәм чарасы үткәрделәр. Көн салкын булганга, бәйрәм фойеда үтте. Балалар бергәләп тә, аерым- аерым да төрле спорт ярышларында актив катнаштылар.

3 июнь көнне Кенәбаш авыл клубы балаларны яклау көне уңаеннан “Без балачак иленнән”дигән исем астында күңел ачу кичәсе уздырды.Авыл уртасында урнашкан балалар мәйданчыгында саф һавада балалар өчен татар халык уеннары, ,шулай ук хәрәкәтле уеннар оештырылды. Балалар барысы да бик теләп уеннарда катнаштылар, соңыннан бергәләшеп саф һавада чәй эчтеләр.

3 июнь көнне Нөнәгәр мәдәният йорты хезмәткәрләре китапханәче белән берлектә мәктәп стадионында, 1 июнь - балаларны яклау көне уңаеннан, 1-5 сыйныф укучылары өчен "Кунелле стартлар" оештырды.

Куныр мәдәният йорты, 1 июнь – балаларны яклау көне уңаеннан, Куныр урта мәктәбенең “Кояшкай” лагеренә йөрүче балалар өчен “Бәхетле балачак” дип аталган дискотека уздырды. Дискотека барышында балаларны бәйрәм белән котладык, төрле мавыктыргыч уеннар оештырдык, кызыклы сорауларга бергәләп җаваплар эзләдек.

Смәел авыл китапханәсе 5нче июнь –Бөтендөнья әйләнә тирәне саклау көне уңаеннан балалар белән “Җирем, суым, күгем”исеме астында чара уздырды.Балаларга табигатьтә үз- үзеңне тоту кагыйдәләре хакында сөйләнде, ахырдан “Мин һәм табигать”дигән леп-бук ясалды.

Халык-ара балаларны яклау көне уңаеннан ,Чапшар авылы балалары белән авылыбызның тарихи урыннарының берсе- 17 гасырда безнең авылда яшәгән мариларның зират урынына сәяхәт кылдык. Марилар үзләре табына торган урынны “Кирәмәт” дип йөрткәннәр икән. Бу зират та “Кирәмәт” зираты дип тарихка кереп калган. Безгә бу турыда һәм авылыбызның тарихын, аның күренекле кешеләре, “Пүгәч” кушаматларының килеп чыгу тарихларын һәм башка бик тарихи , кызыклы вакыйгалар турында Гаязов Шәүкәт абый бик эчтәлекле итеп сөйләде. Шәүкәт абыйны авылыбызның “Шәҗәрәче бабае” дип әйтсән дә ялгыш түгел, чөнки ул авылда яшәүче һәр кешенең 7 буын бабасын бик яхшы белә һәм шәҗәрәләр төзеп бирә. Ул Казан архивларында казынып авылыбыз тарихын кызыксынып өйрәнә. Балалар аның сөйләгәнен тын да алмый йотылып тыңладылар, аннан сорау артыннан сорау яудырдылар. Бу сәяхәт ,аларда авыл тарихын өйрәнүгә бик зур кызыксыну уятты. Тагы авылыбызның шундый урыннарга бару теләген белдереп йөз тапкыр кабатладылар. Торна кырында, табигать кочагында тәмле итеп йомыркалар ашап, уеннар уйнап бик рәхәт һәм файдалы ял итеп кайттык.

1 июнь көнне Комзавод авыл клубында Халыкара балаларны яклау көне уңаеннан "Эх, күңелле балачак!" бәйрәме уздырылды.

5 нче июнь көнне Бөрбаш китапханә филиалында жәйге лагерьга йөрүче балалар белән "Нинди матур минем туган җирем!" исемле балалар иртәсе үтте.