ЯҢАЛЫКЛАР

Илебез буенча октябрь аенда Өлкәннәр көне уздырыла. Өлкән кешеләр – безнең әти-әниләребез, әби-бабайларыбыз. Алар бик күп авырлыклар күргән, дөньяның ачысын-төчесен татыган кешеләр. Бу айда гына түгел, ә һәрвакыт без өлкәннәргә игътибар итеп, хөрмәт күрсәтергә, рәхмәтләребезне әйтергә тиешбез. Төрле җирләрдә өлкәннәрне котлаулар, искә алулар бара. Авыл җирлекләрендә, оешмаларда,мәдәният учакларында төрле чаралар үткәрелә. Шул уңайдан Ор авыл клубы үзешчәннәре Чепьядагы “Наз” сәламәтләндерү үзәгендә үзләренең чыгышлары белән өлкәннәрне котлап кайттылар.

9 нчы октябрь  көнне Бөтендөнья татар конгрессының  "Ак калфак" хатын-кызлар иҗтимагый җәмгыяте рәисе Кәдрия Рәис кызы Чепья авылындагы "Халыклар дуслыгы" музеенда булды. Аларны музей каршында ипи-тоз, якты йөз белән каршыладылар. 

9 нчы октябрь көнне Арча мәдәният йортында  "Наш дом - Татарстан" фестиваленең 4 нче зона туры  булып узды. Анда Теләче, Саба, Мамадыш, Кукмара, Балтач, Арча, Әтнә районнары катнашты. "Вуюись" фольклор коллективы әлеге конкурста катнашып, Казанда узачак финалга үтте.

 Казанда Халыкара "Этномириада”  традицион мәдәният  фестивале  бәйгесе узды. Әлеге бәйгедә Балтач  талантлары да уңышлы гына чыгыш ясадылар : Залялиева Илида - 1 нче дәрәҗә лауреаты, җитәкчесе Аскарова Г.Р., Рамазанова Алина - 2 нче дәрәҗә лауреаты, җитәкчесе  Гарафутдинова Ф.Ф.

Түбән Кенә авыл үзешчәннәре, өлкәннәр ункөнлеге кысаларында матур концерт программасы белән 9 октябрь көнне Пешәңгәр авылы өлкәннәрен куандырып кайтты, концерт күбрәк өлкәннәр чыгышларыннан торды. Һәр номерны тамашачы яратып кабул итте, көчле алкышларга күмде.

Түбән Кенә авылында өлкәннәрне хөрмәтләү бәйрәме үткәрелде. Өлкәннәребез чәй өстәле артында сыйланган вакытта, Т.Кенә һәм Кенәбаш авыл клублары концерт программасы тәкъдим итте.