ЯҢАЛЫКЛАР
Балтач авылара үзәк китапханәсе, балаларның язгы каникулларын мавыктыргыч,кызыклы, файдалы итеп үткәрү максатыннан, кичәләргә, түгәрәкләргә, кызыклы чараларга бик бай булды. “Татарстанда парклар һәм скверлар елы” уңаеннан, «Салават күпере” клубына йөрүче китап укучылар, тозлы камырдан табигать күренешләре ясадылар. Клубның җитәкчесе Гүзәл Фаттахова балаларга кошлар, чәчәкләр, агачлар, үсемлекләр, җәнлекләр ясау серләренә өйрәтте.
Сәрдегән авылында яшәүче Закирова Бибиниса Зыятдин кызына 31 март көнне 90 яшь тулды. Балтач районы башкарма комитеты җитәкчесе Рамил Шакиров, район социаль яклау бүлеге җитәкчесе Алсу Гатиятуллина, социаль хезмәт күрсәтү бүлекчәсе мөдире Әнисә Хәйруллина, Салавыч авыл җирлеге башлыгы Рашит Насыйбуллин, «Татарстан» авыл хуҗалыгы предприятиясе җаваплылыгы чикләнгән җәмгыяте директоры Айнур Нотфуллиннар юбилярны котлап, изге теләкләрен җиткерделәр. Президент Путиннын котлау открыткасын, Балтач муниципаль район башлыгы, соңгы эш урыны һәм авыл җирлеге исеменнән бүләк-күчтәнәчләр тапшырдылар.
30 март көнне бер төркем Балтач районы мәдәният хезмәткәрләре- китапханәчеләр, район Мәдәният үзәге, музей һәм киночелтәр бүлеге хезмәткәрләре, китап укучылар Русиядә Әдәбият елы уңаеннан Арча районы Кушлавыч авылындагы татар халкының сөекле улы Габдулла Тукайның “Тукаевлар гаиләсе музей-йортын”да экскурсиядә булып кайттылар. Экскурсовод Ләйлә Мөнир кызы музейда булган экспонатлар белән таныштырды. Экраннан кечкенә Апушның Кушлавычтагы тормышын чагылдырган слайдлар күрсәтелде. Шулай ук шагыйрь сүзләренә язылган җырлар башкарылды.Без Балтачлылар да буш килмәдек. Районда узган нәфис сүз осталары бәйгесендә призлы урыннар алган Балтач үзәк балалар китапханәсе китап укучылары, Балтач гимназиясенең 3Б сыйныфы укучылары Вахитова Дилия белән Герасимов Азатлар Тукайның шигырьләрен башкардылар. Ә Балтач Мәдәният үзәге хезмәткәрләре Тукай сүзләренә язылган җырларын бүләк иттеләр. Кичә сөекле Тукаебызның “Туган тел” җыры белән тәмамланды. Балтач үзәк китапханә директоры очрашу истәлеге итеп музейга районыбыз тарихын чагылдырган “Балтач энциклопедия”сен бүләк итте.