Район башлыгының Халыклар бердәмлеге көне белән котлавы

Бүген 4 ноябрь –  Халыклар бердәмлеге көне! Илнең көче – анда яшәүчеләрнең бердәмлегеннән һәм теләктәшлегеннән тора. Тормыш-яшәешнең төрле вәзгыятьләре алдында уртак көч булып туплана алу, авыр чакта ярдәм кулы сузу, җәмгыятьтәге вакыйгаларга битарафлык күрсәтмәү, төрле дин һәм милләт халкына, аларның гореф-гадәтләренә хөрмәт белән карау – шул көчнең нигезе. 

Махсус хәрби операция башлануның беренче көннәреннән күпмилләтле илебез халкы үз бердәмлеген, тынычлыкка уртак тырышлык белән ирешү мөһимлеген аңлавын тагын бер кат раслады. Районыбызның Ватанпәрвәр егетләре дә хәрби бәрелешләрдә батырларча катнаша, миһербанлы, олы йөрәкле якташларыбыз фронтка, хәрбиләргә һәм солдат гаиләләренә төрле яклап ярдәм һәм теләктәшлек күрсәтүләре дә олы хөрмәткә лаек.

Россия тарихы уртак флаг астына берләшкән күпмилләтле һәм күпсанлы халык ия булган гайрәтле көчне раслаучы вакыйгаларга бай.  
Балтач районы - илебез территориясендә төрле милләт халыкларының үзара татулыгына һәм ихтирамлыгына нигезләнгән бердәмлек үрнәге булган төбәк. 

Халкыбыз буыннан-буынга күчеп килгән тарихи хәтернең кадерен белә, аны дөрес һәм төпле әхлак-тәрбия нигезләре, Ватаныбызга булган ихлас ярату хисләре аша киләчәк буынга тапшыруга намус һәм җаваплылык белән карый, хезмәт сөючәнлекләре һәм һөнәри осталыклары белән  ил үсешенә лаеклы өлеш кертә. 

Хөрмәтле райондашлар, бүгенге күркәм бәйрәм белән! Үз илебезне, Ватаныбызны, туган җиребезне яратып яшик! 

Ихтирам белән, Балтач муниципаль районы башлыгы Рамил Нотфуллин.