Балтач районы Башлыгының Халыкара өлкәннәр көне белән котлавы
Кадерле өлкәннәребез!
Сезне көзге якты бәйрәм — Халыкара Өлкәннәр көне белән ихластан котлыйм. Өлкәннәр көне безнең барыбыз өчен дә үзенчәлекле бәйрәм. Анда – җылылык, ихласлык, хөрмәт, мәхәббәт салынган. Ул – буыннар бердәмлеге, дәвамчанлыгы, чорлар бәйләнеше символы булып тора. Яшь буын өчен Сез – кыйммәтле байлыкка тиң тормыш тәҗрибәсенә ия затлар, әхлакый кыйммәтләрне һәм гореф-гадәтләрне саклаучылар, балалар һәм оныклар өчен терәк һәм тугры ярдәмчеләр.
Районыбызның иҗтимагый һәм мәдәни тормышында, үсеп килүче буынны тәрбияләүдә өлкән буынның өлеше бик зур. Сез, элек тә, заман авырлыкларына бирешмичә, илебез өчен көчегезне, хезмәтегезне кызганмагансыз, бүгенге көндә дә сезнең зирәклек һәм зур тормыш тәҗрибәсе яшьләргә күп мәсьәләләрне хәл итүдә ярдәм итә.
Бүгенге бәйрәм көнендә бәяләп бетергесез хезмәтегез, көчле рухлы булуыгыз, районыбызга карата булган эчкерсез мәхәббәтегез өчен рәхмәт сүзләрен кабул итегез! Һәрвакыт якыннарыгызның җан җылысын тоеп, җылы карашка кинәнеп яшәгез! Бәйрәм белән, хөрмәтле өлкәннәребез!
Хөрмәт белән, Балтач муниципаль районы башлыгы Нотфуллин Рамил Рәшит улы