ЯҢАЛЫКЛАР
2 - 7 гыйнвар көннәрендә дә райондашлар һәм кайткан кунаклар өчен Яңа ел бәйрәменең күңел ачу программалары дәвам итә.
Район яшьләр эше һәм спорт бүлеге, мәгариф идарәсе, мәктәптән тыш эшләр үзәге белгечләре һәм мәдәният хезмәткәрләре оештыруында Балтач бистәсенең үзәк "Балтач" паркында "Чыршы янында күңелле уеннар" һәм "Сабантуй" паркында күңел ачу чаралары, спорт уеннары, ярышлар үткәреләчәк.
Паркларда күңел ачу чаралары кичке 17.00 - 20.00 сәгатьләрдә оештырыла.
23 декабрь көнне Яшел Үзән шәһәрендә мөмкинлекләре чикләнгән спортчылар өчен бочча ярышы узды.
Биредә Балтач командаса да матур уңышларга иреште. Балалар арасында Балтачтан Максим Александров һәм Кариледән Рузия Галиева Рузия – өченче, Константин Петров исә беренче урын яулап, диплом һәм медаль белән бүләкләнде.
Зурлар арасында Чулпан Габделганиева – беренче, Ева Александрова – икенче, Фәнис Сөләйманов өченче призлы урынга лаек булды, шулай ук диплом белән медальләр белән бүләкләнделәр.
Районда чаңгы сезонын ачу уңаеннан, "Сабантуй" спорт һәм күңел ачу паркында әлеге спорт төрен үз итүче райондашларыбыз белән берлектә 3 гыйнвар көнне - район беренчелегенә, ә 6 гыйнвар көнне районның барлык авыл ьирлеклре, оешма-учреждение һәм хезмәт коллективлары командалары катнашында чаңгы ярышлары булачак.
Ярышларда катнашырга көтеп калабыз. Актив булыйк!!!
Хөрмәтле райондашлар, Сезне 29 декабрь көнне район мәдәният үзәгендә «Яңа елга - яңа җыр» дип исемләнгән театральләштерелгән музыкаль тамаша карарга чакырабыз! Башлана: 19.00 сәгатьтә. Рәхим итегез!!!
Районыбызның иң сәләтле балаларының Республика күләмендә Татарстан Президенты җитәкчелегендә уза торган Яңа ел чыршысында катнашырга чакыру алуы матур традициягә әверелде. Әлеге зур мәртәбәле чараны балалар көтеп ала.
Быел да - 25 декабрь көнне районыбызның иң актив балалары башкалада оештырылган тантаналы чарада катнашу бәхетенә иреште. Район мәктәпләрендә белем алучы тырыш һәм күп балалы гаиләдә тәрбияләнүче, уку алдынгылары булган, олимпиадаларда җиңү яулаган, төрле сәнгать, спорт бәйгеләрендә һәм конкурсларда уңыш казанган 32 укучы һәм "Татарстан варислары" берлеге әгъзасы буларак, еллык нәтиҗәләр ясаган чарада катнашкан тагын 3 бала "Татнефть-Арена" боз сараенда узган чыршы бәйрәмен тамаша кылып, Президентның Яңа ел бүләгенә лаек булып кайттылар.
Яңа елны каршыларга санаулы көннәр калды. Ел да бу бәйрәмне көтеп алабыз, ниндидер могҗиза өмет итәбез. Өйләребездә чыршы бизәп куябыз, гаиләбездә бәйрәм рухы тудырырга тырышабыз. Бу матурлык өй ишеген бикләп, урамга чыгу белән юкка чыгарга тиеш түгел... Чөнки райондашларыбыз тырышлыгы белән урамнарда, тирә-якта күңелләргә хуш килерлек, бәйрәм рухы тудыра торган мохит булдырылсын иде.
Күрше-тирә районнарны, калаларны күреп, "Ничек матур!" дип сокланырга бик яратабыз да, ә үзебездә шул матурлыкны ник булдырмыйбыз соң ?! - дигән каршылыклы фикер туа. Матурлык безнең өчен кирәк, аны да без үзебез тудырырга тиеш. Беркемгә дә читтән килеп ясап бирмәгәннәр, югыйсә....
Район халкының сәламәт яшәү рәвешенә, яшь буынның спортка тартылуына зур игътибар бирергә, хоккей уйнау күнекмәләрен ныгытырга кирәк, дигән өмет-максат белән һәр елны башлап җибәрәбез. Ә моның өчен барлык шартлар да җитәрлек күләмдәме соң?!
Бигрәк тә, кышкы чорда һава торышына бәйле рәвештә, каршылыклар килеп чыгырга мөмкин. Бер көнне бик салкын, икенче көнне күз ачмаслык буран булуы, сыртлап кар көртләре салуы бар... Тик шундый очракларда да халык күпләп йөри торган урыннарда юллар көрәлгән, кардан ачылган булырга тиеш.
Елның-елында муниципаль район башлыгы призына татарча көрәш ярышлары белән без узып баручы елны төгәллибез. Нинди вакыйгалары белән кереп калды соң күңелләребезгә быелгы көрәш сезоны? Билгеле, безне куандырган вакыйгалар күп булды. Беренчедән, ел башында ук Зәй шәһәрендә Муса Җәлил истәлегенә узган ярышларда ТР Премьер-министры урынбасары, Авыл хуҗалыгы һәм азык-төлек министры, республика көрәш федерациясе рәисе Марат Әхмәтов кулыннан бүләк алырга районыбыздан бер-бер артлы 5 кеше күтәрелде. Район яшьләр эшләре һәм спорт бүлеге җитәкчесе Рөстәм Заһидуллин, дәрәҗәле көрәшчеләребез Ранил Габдрахманов, Ринат Хәйретдинов, Сәйдәш Мәгьсүмов, спорт журналисты Нурзада Сәмигуллин. Мондый хәлнең әле бер район вәкилләре белән дә булганы юк иде, һәрхәлдә, мин белгән дәвердә. Икенчедән, көрәштә дә башка елларда югалткан позицияләребезне кайтара башладык.
Балтач укучылары бүгенннән, ягъни 26 декабрьдән башлап, 8 гыйнварга кадәр кышкы каникулга туктады. Шул ук вакыта районның төп һәм урта 11 мәктәбе базасында 7 көнлек кышкы мәктәп яны лагерьлары оештырылды. Каникул чорында бу лагерьларда барлыгы 425 бала тәрбияләнәчәк.
Татарстанда көзге ярминкәләрнең соңгысы үтте. Татарстан Президенты Рөстәм Миңнеханов «Казан» агропромпарк ярминкә мәйданында булды. Аның белән ярминкәне вице-премьер –Татарстан авыл хуҗалыгы һәм азык-төлек министры Марат Әхмәтов, Казан мэры Илсур Метшин һәм башка рәсми затлар карады.
Агропромпаркта Балтач районы җитештерүчеләре продукциясе дә мул итеп куелган иде. Аерым алганда, биредә яшелчә, ит, бал, май һәм башка күп төрле товар алырга мөмкин булды.