"Сабантуй" паркында "Чана-тау" барлыкка килде.

«Сабантуй» ял һәм спорт паркы матурлана, заманчалаша бара. Соңгы көннәрдә генә МДСУ-1 районара юллар төзелеше идарәсе тырышлыгы белән Кара күл ягына бара торган юл буенда «Чана-тау» сафка басты. Янәшәдә генә чаңгы юлы булдырылды. Бирегә бистә халкы гына түгел, ә тирә-як авыллардан килүчеләр дә күренә башлады. Паркка керү юллары, мәйданы,чана шуу һәм чаңгы трассасының 1200 метр өлеше яктыртылган. Биредә 17.00 – 20.00 сәгатьләрдә ут яна. Шулай ук радио эшчәнлеген булдыру, музыка яңгырату, автокинотеатрны эшләтү буенча хәзерге көннәрдә эшләр башкарыла.