Марат Бариев белән Римма Ратникова Балтачта эшлекле сәфәрдә булдылар

30 август – Республика көнен билгеләп үтү уңаеннан, Балтачта истәлекле вакыйгалар күп булды. Көндезге сәгатьләрдә район башлыгы Рамил Нотфуллин башкалабыздан килгән бертөркем мөхтәрәм кунакларны каршы алды. Кунакларыбыз – РФ Дәүләт Думасы депутаты, Татарстанның элеккеге яшьләр эшләре, спорт һәм туристлык министры, якташыбыз Марат Бариев, республика Дәүләт Советы Рәисе урынбасары Римма Ратникова һәм башка рәсми затлар. Алар эшлекле сәфәр белән Норма авыл җирлегендә урнашкан, ел дәвамында капиталь ремонт эшләре барган һәм күптән түгел генә кулланылышка тапшырылган социаль мөһим объектларда булып, үз бәяләрен бирделәр. Норма урта мәктәбенедә заманча спорт залны, Кариледә урнашкан яңа чистарту корылмасын, Кариле дәвалау амбулаториясен карадылар һәм Бөек Ватан сугышы ветеранының тол хатынына салынган яңа йортта өй туенда булдылар, төзелеш эшләреннән канәгать булуын белдерделәр. Ә аннан соң алар “Сабантуй” паркына бәйрәмне ачу тантанасына юл алдылар.