Балтач муниципаль районы

Балтач терлекчеләренең ярты еллык эш нәтиҗәсе

2015 елның 10 июле, җомга

Быелның беренче яртысында иң күп сөтне, гадәттәгечә, «Татарстан» хуҗалыгы җитештерде. Узган ел шушы чордагыдан 34 тоннага артырып, 2473 тонна саудылар. Бу «Труд» белән «Алга» хуҗалыкларының икесендә җитештерелгән сөт кадәр. Ә «Арбор», «Борнак», «Уңыш» җәмгыятьләрендә җитештерелгән сөтне өчесенекен бергә кушып та татарстанлылар ирешкән үргә җитми. Ярты елда 4 җәмгыятьтә: «Уңыш»та – 188, «Активис»та – 136, «Игенче»дә – 137, «Арбор»да 30 тонна сөтне узган елның шул чорындагыдан ким җитештерделәр. Ә «Яңа тормыш» җәмгыятендә – 122, «Сорнайга – 115, Тимирязев исемендәге җәмгыятьтә 109 тонна сөтне узган елның беренче яртысындагыдан күп саудылар һәм сөт сатып акчаны да узган елгыдан күбрәк эшләделәр.

Узган елның беренче яртысына карата артык җитештерелгән сөтне акчага күчергәндә, керәсе суммалар һәркемне кызыктырырлык. Район буенча ул 501 тонна сөткә 9 миллион 176 мең сум тәшкил итте. Бу суммадан зур калҗалар түбәндәге хуҗалыклар өлешенә туры килә. Мәгълүматлар авыл хуҗалыгы һәм азык-төлек идарәсеннән алынды. Беренче сан – быелның беренче яртысында узган елның шул чорындагыдан артык җитештерелгән сөт (тонналарда), икенчесе – ул акчага күчергәч (мең сумнарда)

Яңа тормыш	122	2328
Сорнай	115	2137
Тимирязев исем.	109	2063
Якты юл	97	1825
Бөрбаш	96	1787
Алга	86	1631
Смәел	90	1620
Тукай исем.	57	1091

Май аенда районда терлекчелектәге эшкә анализ Рәкыйп Нәҗипов (уртада) җитәкләгән «Кама» хуҗалыгында ясалган иде.

Ә шушылар янәшәсендә эшләгән «Уңыш»та – 3696, «Активист»та – 2588, «Игенче»дә 2237 мең сум акчаны, сөтне узган елгыдан ким җитештерү сәбәпле, алалмый калдылар.

Район авыл хуҗалыгы җәмгыятьләре быел беренче яртыеллыкта 2271 тонна сөтне былтыр шул чордагыдан күп сат-тылар. Монда да сводкада икенче урында торган «Дуслык» тан да 318 тоннага күбрәк сөт саткан «Татарстан» хуҗалыгы әйдәп бара. Сводкадагы саннарның беренчесе – быел, икенчесе – узган ел 1нче июльгә район хуҗалыклары саткан сөт (зачет авырлыгында, 3,4 процент майлылыкка күчереп исәпләп, тонналарда)

Татарстан	2674	2555
Дуслык	2356	2203
Кызыл юл	2068	1981
Бөрбаш	1966	1755
Игенче	1889	1971
Яңа тормыш	1886	1561
Тимирязев исем.	1768	1292
Маяк	1716	1568
Сорнай	1674	1453
Смәел	1526	1413
Кама	1514	1473
Алга	1461	1241
Сосна	1381	1373
Якты юл	1369	1167
Труд	1277	1132
Активист	1258	1394
Тукай исем.	1146	1085
Арбор	911	888
Борнак	830	721
Уңыш	666	838
Район буенча	31336	29065

Сөтне иң югары бәя белән – килограммын 19 сум 70 тиеннән – «Татарстан» хуҗалыгы сатты. «Смәел», «Сосна», «Борнак», «Арбор» хуҗалыклары саткан сөтнең килограммы 18 сум 50 тиен дә булмады.

Сөт җитештерүгә сизелерлек йогынты ясый торган факторларның берсе – сыерларны вакытында бозаулату, көтүне яхшы таналар белән яңартып тору икәнен авыл агае яхшы белә. Быел беренче яртыеллыкта район җәмгыятьләрендә 7913 – узган ел шушы чордагыдан 376 башка күбрәк бозау алынды. Монда былтыргыдан 115, 97 һәм 86 башка күбрәк бозау алган «Маяк», Тимирязев исемендәге, «Смәел» хуҗалыклары алда бара. Ә «Игенче»дә – 40, «Активист»та – 31, «Уңыш»та 17 баш бозауны узган елның беренче яртысындагыдан кимрәк алдылар. Бетерелгән дуңгызлар урынына сыерларның баш санын арттыру таләбе куелган иде. «Дуслык», «Яңа тормыш», «Сосна», «Смәел», «Труд», «Кызыл юл» хуҗалыклары җитәкчеләре һәм белгечләре бу таләпкә җаваплы карадылар, хәзер аларда сыерлар былтыргыдан күбрәк асрала. Ишле мал ит җитештереп акча эшләү мөмкинлеген дә арттыра. «Сосна»да, мәсәлән, 5 миллион 452 мең сумлык сыер итен узган ел ярты елдагыдан артык җитештерделәр. «Труд»та бу өстәмә 2 миллион 750 мең сум булды.

Малларга картаеп сабакка әйләнгән үләннәр ашатып мул продукция алып булмый, диләр район авыл хуҗалыгы һәм азык-төлек идарәсе белгечләре. Әмма кайбер фермаларга әле һаман күпьеллык үләннәр кайтарыла. Югыйсә, инде кузаклылар белән катнаш чәчелгән басулардан берьеллыкны кайтарырга вакыт. Терлекләр рационын макро-микро элементлар белән баетуны җәен дә туктатмаска кирәк. Хуҗалыкларга акчаның 80 проценттан артыгы терлекчелектән кергәнен бер генә көнне дә онытмыйк.

БАРЛЫК ЯҢАЛЫКЛАРНЫ УКУ