Чакыру-ярдәм итү: без социаль хезмәткәрләребезне хөрмәтлибез
Хөрмәтле райондашлар! Агымдагы атнада "Рәсми Балтач" төркеме аша сезне районыбызның иң игелекле, җылы йөрәкле кешеләре — социаль хезмәткәрләребез белән таныштырып киләбез.
Балтачыбыз зур, халкыбыз күп. Тормыш көзен ялгыз каршы алучы әби-бабайларыбыз да шактый. Аларга көндәлек ярдәм күрсәтүче фидакарь затлар — социаль хезмәткәрләр һәм шәфкать туташларының гомуми саны нибары 53 кеше генә. Зур территорияне, мохтажларның санын исәпкә алсак, бу саннар артында никадәр зур хезмәт һәм олы йөрәк ятканын күз алдына китерү авыр түгел!
Картлык – шатлык түгел, диләр. Шуңа күрә дә бу өлкәннәргә карата аеруча сизгерлек, сабырлык һәм ихтирам кирәк. Үз карамакларында булган һәр әби-бабабызга шәхси якын килеп, һәрберсенең холкын аңлап, күңеленә юл таба белгән, аларны үз туганнарыдай якын итеп тәрбияли белгән социаль хезмәткәрләр алдында баш иярлек!
Без бүген шундый матур парлы дуслыкка тап булдык. Балтач бистәсендә яшәүче Шәмсенур апа Шәрәфиева янында аның социаль хезмәткәре Гөлназ Мөхәммәтҗанова белән очраштык.
Гөлназның иртәсе үк тәрбиясендәге өлкәннәр хакында уйлаудан башлана икән. Ул аларның һәркайсын бик яратып, чын күңелдән хөрмәтләп тәрбияли. Без барганда да алар бергәләп бакча эшләре белән мәшгуль иде. Яшелчәләр утырталар, табигатькә чыгып саф һава сулыйлар. Бу бит гап-гади ярдәм генә түгел, ә аралашу, рухи терәк тә! Өйдә дүрт стенадан гайре берни күрмәгән кешенең көне шулай ямьле, мәгънәле үтә.
Шәмсенур апаның күзләрендәге нур, Гөлназга карата булган рәхмәте сүзләр белән генә аңлатып бетергесез. Менә ул чын мәгънәсендәге шәфкатьлелек үрнәге!
Хөрмәтле райондашлар! Сезнең арада да, җирлектә өлкән яшьтәге якыннарыгызны кадерләп тәрбияләүчеләр бармы? Бәлки, сезнең дә шушы мактаулы һөнәр ияләренә әйтер рәхмәт сүзләрегез бардыр? Комментарийларда языгыз, уртаклашыйк бу җылы тарихны!
#соцзащитаБалтаси