Тукайлы яз

Ямьле апрель аенда бар җиһан зурлап халкыбызның бөек улы Габдулла Тукайның 130 еллык юбилеен билгеләп үтә. Китапханәләрдә, мәдәният йортларында, ял паркларында шагыйрьнең иҗатына, әсәрләренә багышлап төрле чаралар уза. Менә бүген, 19 апрель көнне Балтач үзәк балалар китапханәсендә  дә яраткан шагыйребезне балаларга тагы да якынайту, әсәрләре,  гыйбрәтле тормышы белән таныштыру максатыннан “Тукайлы  яз” исемле әдәби кичә узды. Кичә барышында китап укучыларыбыз аның китапханәдәге китапларына сәяхәт кылдылар, әсәрләре буенча төзелгән сорауларга җаваплар бирделәр, шагыйрьнең шигырь-әкиятләрен тыңладылар. Ә Балтач урта мәктәбенең 4Б сыйныфы укучылары көче белән әзерләнгән Тукай әкиятләре буенча күрсәтелгән күренеш (җитәкчеләре Тухватуллина Ф.К., Ибраһимова А.Р.) чарабызның зур бизәге булды. Кичәбезнең кунаклары булган гимназиянең 1А сыйныфы укучылары үзләренә күп мәгълүмат һәм укырга китап алып киттеләр.