“Яшь гаилә” клубының чираттагы очрашуы

Балтач бистәсенең Никахлар теркәү бүлеге каршында 8 нче июль көнне Гаилә, мәхәббәт, тугрылык көненә багышланган “Яшь гаилә” клубы утырышы уздырылды.

Очрашуда Яңгул авылыннан, 62 ел матур итеп гомер иткән, Габделбари һәм Нәзифә Габделбариевлар һәм  никахлашуга гариза биргән яшь парлар катнашты. Балтач башкарма комитеты урынбасары Илһам Гайнетдинов тантаналы рәвештә өлкән парга “Мәхәббәт һәм тугрылык өчен” дип исемләнгән медаль тапшырды. Чарага №2 балалар бакчасы нәни артистлары көче белән башкарылган  концерт номерлары күңелне күтәрде. Нәзифә апа һәм Габделбари абый тату гаилә тормышы серләрен ачтылар, тәҗрибәләре белән уртаклаштылар.

            Яшьләр өчен “Наз” Үзәге психологы Энҗе Корбанова һәм социаль  педагог Фирүзә Исхакова “Ышаныч” исемле профилактик занятие уздырдылар. Һәркем кызыклы күнегуләрдә катнашты, борчыган сорауларына җавап, киңәшләр  алды.