Балтач муниципаль район башлыгының Өлкәннәр көне белән котлавы
Кадерле өлкәннәребез! Сезне көзге якты бәйрәм - Халыкара өлкәннәр көне белән ихластан котлыйм һәм иң изге теләкләремне җиткерәм!
Өлкән буын кешеләре зирәклек чыганагы, ә бәйрәмебез заманнар һәм буыннар бәйләнешен гәүдәләндерә. Бүгенге яшь буын өчен сез кыйммәтле байлык,тормыш тәҗрибәсен саклаучылар булып торасыз.Яшьләрнең энергиясе,инициативасы һәм өлкән буынның бай тәҗрибәсе - тормышыбыз мәгънәсенең бер-берсен тулыландыручы аерылгысыз өлешләре.Тормышта авыр минутлар булганда, киңәш сорап, сезгә мөрәҗәгать итәбез,сезнең белән шатлык-уңышларыбызны уртаклашабыз.Сез илгә лаеклы уллар-кызлар үстердегез, бүген уңай тормыш тәҗрибәсен, әхлакый кыйммәтләрне һәм гореф-гадәтләрне саклап, оныклар, оныкчыкларга тапшырасыз. Сезнең гомер - ул байлык.
Заман авырлыкларына бирешмичә, илебез өчен көчегезне, хезмәтегезне кызганмагансыз. Бу дөньяда куйган хезмәтләрегез, кылган изгелекләрегез өчен рәхмәт сезгә! Һәрвакыт янәшәдәгеләрегезнең җан җылысын тоеп, җылы карашка кинәнеп яшәгез! Көннәрегез бәхет-шатлыкта үтсен. Сәламәтлекләрегез нык,күңелләрегез гел шат булсын. Җәмгыятебездә кирәкле булуыгызны тоеп, рәхәттә, бәрәкәтле яшәүләр насыйп булсын сезгә! Бәйрәмегез котлы булсын!
Хөрмәт белән, Балтач муниципаль районы башлыгы Рамил Рәшит улы Нотфуллин