Рөстәм Миңнеханов Балтач районыннан Альбина Сәләхиевага «Ана даны - Материнская слава» медале тапшырды
Татарстан Президенты Рөстәм Миңнеханов Балтач районының Кариле авылыннан биш бала анасы Альбина Сәләхиевага «Ана даны - Материнская слава» медале тапшырды. Тиешле указ республика башлыгының рәсми порталында урнаштырылган. Күп балалы ана балалар тәрбияләүдә һәм гаилә традицияләрен ныгытуда күрсәткән хезмәтләре өчен бүләккә лаек булды.
«Ана даны - Материнская слава» медале белән Татарстан территориясендә яшәүче, биш һәм аннан да күбрәк бала тапкан һәм тәрбияләгән, кимендә бер балигъ булмаган бала булган аналар - Россия Федерациясе гражданнары бүләкләнә. Бүләкләүгә тәкъдим ителгәндә уллыкка алынган балалар һәм Ватанны саклаганда хәбәрсез югалган яки үлгән, бәхетсезлек очраклары аркасында яки башка хәрби бурычларын үтәгәндә үлгән балалар да исәпкә алына.