Республика көненә һәм ТАССРның 100 еллыгына багышланган традицион ат-спорт бәйрәме
30 августта «Казан» халыкара ат спорты комплексында Республика көненә һәм ТАССРның 100 еллыгына багышланган традицион ат-спорт бәйрәме узды.
Бәйрәм программасы төрле иде, әмма тамашачыларның игътибар үзәгендә, әлбәттә, ат чабышлары һәм ипподромның йөгерү юлларындагы узышлар булды.
«Казан» халыкара ат-спорт комплексына Татарстан Республикасы Президенты Рөстәм Миңнеханов та кунак булып килде. Аны Татарстан Республикасы Премьер-министры урынбасары – авыл хуҗалыгы һәм азык-төлек министры Марат Җәббаров каршы алды.
Ат чабышларында районыбыз да зур җиңүләргә иреште. «Татарстан» хуҗалыгының «Лондарка» кушаматлы чиста токымлы аты Татарстан Республикасы Авыл хуҗалыгы һәм азык-төлек министрлыгы призына ярышта беренче урынны яулады! Шулай ук, Закиров крестьян-фермер хуҗалыгының «Вэйверли» кушаматлы аты чиста токымлы гарәп атлары арасында икенче урынга лаек булды!