Кыр батырларын бүләкләү

2020 елның 28 июне, якшәмбе

Бүген, 28 июнь көнне Балтач районында кыр эшләренең алдынгыларын, абсолют батырын котладылар һәм сабан бәйрәме мәйданчыгында ук бүләкләделәр.

Район механизаторлары 41 000 гектар чәчүлек  җирләрен сөрделәр, шуның 2000 гектарына якынын үз тракторында «Якты юл» ҖЧҖ механизаторы Нуртдин Гайсин эшкәртте.

Батырлар арасында чәчүлекләрне эшкәртүдә катнашучылар да бар иде. Мәсәлән, «Борбаш» ҖЧҖ  механизаторы Илнар Гыйльмуллин кырда битлек һәм перчаткаларда эшләгән. Ул кырда эшләгәндә күрелгән саклык чаралары турында сөйләде. Аның сүзләренә караганда, аларга перчаткалар һәм хәтта противогазлар да бирелгән, боларның барысын да кырга чыгу алдыннан кигәннәр, үзләре белән һәрвакыт су һәм сабын алганнар, кулларын даими рәвештә юып торганнар. 

Зиннәтуллиннар хезмәт династиясенең эш стажын  кушсаң, нәкъ 100 ел була, биредә кыр эшләрендәге эволюцияне ишетеп кенә белмиләр, ә һәр буын үзләре күреп тора. Әйтергә кирәк, «Арбор» ҖЧҖ механизаторы Газизулла Зиннәтуллин элек кырларда эшләү кыенрак иде, хәзер техника да яңарды, эш тә компьютерлар аша башкарылганга күрә җиңелрәк тоела дип билгеләп үтте.

«Чәчү батыры» исеменә «Маяк» ҖЧҖ механизаторы Тәбрис Гайфуллин лаек булды, бу җиңү аның өчен иң беренчесе һәм көтеп алынганы. Җиңүче болай ди: «Бөтен кеше алдында мине шундый зурладылар - беренче урын белән югары бәяләделәр. Күңелдә шундый рәхәтлек, мондый бүләк елга бер тапкыр булырга  мөмкин, әле  анысы  да - бәхет елмайса гына». Чәчү батырына бүләк итеп чын, тере тәкә бирделәр.

Балтач районы башлыгы Рамил Нотфуллин җиңүченең  ничек ачыклануы турында сөйләде: «Язгы кыр эшләренең барлык күрсәткечләре – эшкәртү, культивацияләү һәм чәчү эшләре күләмнәре саналды, шул исәпләүләр буенча иң югары күрсәткечләргә ирешүче җиңүче дип танылды» - диде ул.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International