Балтач муниципаль районы

2012нче елның 14нче октябрендә үтәчәк сайлаулар турында

2012 елның 11 октябре, пәнҗешәмбе

2012нче елның 14нче октябрендә Татарстан Республикасы Дәүләт Советына 47нче номерлы Кукмара сайлау округы буенча бушаган депутат мандатына өстәмә сайлаулар үткәрелә. Округ сайлау комиссиясендә депутатлыкка 4 кандидат теркәлде. Шуның нигезендә сайлау бюллетеньнәрендә – КПРФтан Волкова Г.А. (пенсионер), “Россия патриотлары” партиясеннән Гимадиев Н.Г. (Кукмарадан “Водотехносервис”, “Инженерные сети” җаваплылыгы чикләнгән җәмгыятьләре директоры), “Бердәм Россия” партиясеннән М.Х.Зарипов (Балтач муниципаль районы башлыгы), “Парнас” партиясеннән И.В.Новиков (Казандагы “Компания Новая Идея” җаваплылыгы чикләнгән җәмгыятендә менеджер). Кандидатлар турында тулырак мәгълуматлар белән участок сайлау комиссияләрендә танышырга була.

Моннан алдагы сайлаулардагы кебек үк, безнең районда барлыгы 33 сайлау участогы оештырылды, шуларның 4се – Балтач шәһәр җирлегендә, калганнары 17 авыл җирлегендә. Әлеге комиссия әгъзалары сайлаучылар исемлеген барлыйлар, булган үзгәрешләрне кертәләр, сайлаучыларны кабул итәләр. Сайлауларга кагылышлы сораулар белән сайлаучылар үзләренең җирлекләрендәге участок сайлау комиссияләренә, шулай ук Балтач районы территориаль сайлау комиссиясенә мөрәҗәгать итә алалар. Безнең адрес: Балтач бистәсе, Ленин урамы, 42нче йорт. Телефоннар: 24334, 24972.

Сайлаучыларның хокукларын тәэмин итү беренче чиратта “Россия Федерациясе гражданнарының сайлаучы хокукларын һәм референдумда катнашу хокукын гарантияләү турында”гы канунында беркетелгән.
Һәрбер сайлаучы участок сайлау комиссияләренә барып, үзләренең исемлеккә кертелүен, андагы үзе турындагы мәгълүматның дөреслеген тишерергә хокукы бар. Шулай ук биредә сайлау бюллетененең эчтәлеге белән, анда кертелгән кандидатлар исемлеге белән һәм тавыш бирү тәртибе белән танышырга мөмкин. Кулында РФ гражданины паспорты булган һәм безнең җирлектә яшәү урыны буенча теркәлгән сайлаучы тавыш бирү көнендә участокка килгәч, аның ниндидер сәбәпләр белән исемлектә булмавы ачыкланса, сайлау комиссиясе аны шәхси гаризасы нигезендә өстәмә исемлеккә кертә.

Хөрмәтле райондашлар! Һәр сайлаучыны 14нче октябрь көнне сайлау участокларына килеп, үзләренең конституцион хокукларыннан файдаланып һәм гражданлык бурычын үтәп, Татарстан Республикасы Дәүләт Советына үзебезнең депутатны сайлау буенча тавыш бирергә чакырам. Сайлау участоклары иртәнге сәгать 7дән кичке сәгать 8гә кадәр ачык булачак.

Р.Кәримов,
Балтач район территориаль сайлау комиссиясе рәисе.

БАРЛЫК ЯҢАЛЫКЛАРНЫ УКУ