Балтачта район үзәк хастаханәсе табибларына яңа йортлар тапшырылды

Бүген - 29 декабрь көнне, Яңа елга бүләк итеп мәртәбәле кунаклар катнашында тантаналы төстә Балтач район үзәк хастаханәсе табибларына юнәлешле программа нигезендә бистәдә төзелгән 2 аерым йорт файдалануга тапшырылды.Бу вакыйгада ТР Дәүләт Советы рәисе урынбасары Римма Ратникова, район башлыгы Рамил Нотфулллин һәм шулай ук район башкарма комитеты җитәкчесе Рамил Шакиров, баш табиб Газинур Дәүлиев, төзелеш-подряд оешмасы вәкилләре катнашты. Районыбызга чит төбәкләрдән  килеп, үзләренең хезмәтләре һәм кылган игелекле гамәлләре белән халык ихтирамын яулаган район үзәк хастаханәсенең хирургия бүлеге табиблары Алишер Ахматхожаев белән  Сәетәхмәт Гаипназаровларның гаиләләре әлеге зур вакыйганы сөенеп кабул итте. Татарстан Президенты Рөстәм Миңнеханов тарафыннан хуплау тапкан программалар районыбыз җирлегендә дә тормышка аша. Табиблар өчен махсус сафка баскан бу яңа йортлар район хастаханәсенә чит төбәк яки районнардан килеп эшләүчеләр өчен арендалы торак буларак тәкъдим ителә.