Балтачта эшләсәӊ, эш табыла

Иске универмаг  чатынанн төшкән урам асфальт белән түшәлгән, анысы да әлегә таушалмаган, чокырлар барлыкка килмәгән. Инде шушындый җирдә дә Балтач юл төзү һәм ремонтлау участогы егетләре тагы нәрсә казыйлар икән, дисәм, сәбәбе ачыкланды. Көчле яӊгырлар яуганда  суныӊ юлга сыймыйча акканын да, көзге яӊгырныӊ бу өслектә бозлавыкка әйләнеп, монда куркыныч шугалак ясалганын да күргән бар шул. Нәкъ менә шундый хәвеф-хәтәр килеп чыкмасын өчен юл кырында җир астыннан су юлы, ягъни «ливневка» ясыйлар икән егетләр. Үзәктәге икенче номерлы балалар бакчасы, базар, элекеге мунча бинасы каршында  тар юлны зурайтып, нәкъ шушылай эшләгәннәр иде һәм бик уӊайлы булып чыкты. Бу юлы да башкарылган эшләр файдага булсын, дип теләп калабыз.