Чутай авылында халык җыены
19 нчы август көнне Балтач муниципаль район башлыгы урынбасары Сабирҗанов Наил Нургаяз улы, «Бердәм Россия» партиясеннән Татарстан Республикасы Дәүләт Советына депутатлыкка кандидат Ратникова Римма Атлас кызы катнашында Чутай авылында халык җыены булып узды. Җыенда җирлек депутатлары, учреждение җитәкчеләре, балалар бакчасы хезмәткәрләре, авыл картлары, авыл халкы катнашты.
Көн тәртибендә каралды:
- Гражданнарның үзара салым акчасы һәм җирле бюджет хисабына, шулай ук Татарстан Республикасы программаларына соңгы 5 елда башкарылган эшләр. Нөнәгәр авыл җирлеге башлыгы Әхмәтханов Альфред Заһир улы чыгыш ясады.
- Башкарылган эшләр һәм район күрсәткечләре. Киләсе ТР Дәүләт Советына депутатлар сайлау. Чыгыш ясады: Балтач муниципаль район башлыгы урынбасары Сабирҗанов Наил Нургаяз улы.
- Ратникова Римма Атлас кызы алда торган сайлаулар һәм үз кандидатурасы турында сөйләде.
Җыенда катнашучылар бик актив булдылар һәм алар өчен актуаль булган темаларны күтәрделәр, кызыксындырган сорауларын бирделәр. Җыенда юлларны төзекләндерү, пенсионерлар өчен интернет-уку, район үзәк хастаханәсе һәм Чепья хастаханәсе турында сораулар яңгырады. Шулай ук гражданнар Кече Лызи – Чутай автобусы маршрутын карап, аны уңайлырак итүләрен сорадылар. Барлык сорауларга да җаваплар бирелде. Киләчәктә аларны үтәү буенча эшләр башкарылачак.
Мәдәният хезмәткәрләре һәм үзешчәннәр коллективы җыелучыларны җыр-биюләре белән сөендерделәр.